san francisco

iz bi i oepe scho drue wuche hie. s chunnt mir irgendwie scho viel laenger vor. ha mi aecht guet iglaebt hie.

obwohl mir hie mega guets wetter hei (sit i hie bi hets fangs 2 taeg graegnet) ha i mi verkaeltet. naja bi ja au selber schuld. d haustuerene sie hie so konstruiert, dass wenn usegeisch d tuer automatisch naer bschlosse isch, d.h. muesch halt immer ae schluessel mitnae oder nid vergaesse aes knoepfli bir tuere z dreihe. ja u denn wo i no bir sabrina ha gwohnt, sie isch grad am schaffe gsi, ha i eis woue ga rauche uf ae balkon und ha vergaesse dr schluessel mitznae. super, bi naer bir nachbarin ga klopfe u die het mir de gholfe u am mann mit aem ersatzschluessel agluete. z problem isch, dass we dir ae amerikaner seit aer choemm so irae halb stund, das guet au ae stund cha si. ha de oepe 1, 5 stund uf aem balkon gwartet bis de aendlich dae ueberus naett aelter herr isch cho. derfuer het aer mir d koeste vo 50 dollar la si.

z gliche isch hie mit de buse. aes git i daem sinn kei fahrplan. geisch eifach mal zur haltstell u de chas si, dass so a halb stund bis ae stund uf nae bus wartisch. d luet naehmes aber mega easy hie. es het uf jede fall scho maengs lustigs gspraech derduer gae;-). muess eh saege das die meiste luet hie ir stadt aecht u naett si. da wirsch sogar am morge frueh vo fremde luet gruesst (wie im nae dorf ir schweiz) u bim einsteigen i bus hei fraue u aelteri luet immer vorrang. z glich bim sitze. u sogar z anstehen im nae gschaeft funktioniert hie.

aecht schoen isch es au am morge. d sunne schient scho am achti u meistens isch knallblaue himmel. iz wo i au die verschiednige quartier hie chli naecher bi ga aluege, ha i gmerkt, dass d luet hie aecht nid so typisch ami-maessig si. d istellig isch: jede cha mache u lebe wie aer wett, aer darf eifach niemmer anders verletze oder ischraenke derbi.

eifach so raecht spezielli verbot hei sie hie. ha grad vor kurzem mir aes bier kauft u das waehrend aem laufe woelle trinke: vergiss aes, denn trinke vorusse isch verbote. naja die meiste luet hei uf jede fall ihre waeg gfunde, damit sie ihres bier am strand oder so choei trinke ;-).

was ou so erstaunlich isch, isch dr gsundheitswahn wo sie hie hei. chasch oepe bi allem d lightversion usw. ha. u wo i z erste mal i naes einkaufzenter bi, bi i aecht ueberforderet gsi. fuer nae eifachi tomatensauce (ir schweiz hesch ev. 2 marken zur uswahl) muesch die hie zwuesch oepe 3 - 4 marken entscheide. plus de gits no eini ohni fett, eini ohni salz, eini mit daem, u.s.w. naja nid so mis ding.

mit aem massieh ha igs au mega guet. aer het iz beschlosse nur no englisch mit mir z rede (aer red fliessend deutsch), woue aer findet: it's better for you... aer wohnt scho sit 15 jahr hie u het mir scho aecht gueti typs choenne gae. iz goe mir de mal im castro i usgang. so i nae gay-schuppe, wo schiens die besti musik lauft und offe het vom sa abe bis so abe ;-)..

sit i hie bi, bi i mega viel umegluefe. huegel uf und huegel ab. aube so 4 - 5 h am stueck. iz ha i so das wo mi interessiert gseh: chinatown (isch mir ae chli z bunt und z ueberfuellt gsi, aber sicher sehenswert), financial district (aecht gigantischi gebaeude), south of market (very trendy), fisherman's wharf (dr hafe u touriort nr. 1), japantown (mega schoen u sehr ruhig), fillmore (mit aem beruehtme filmore auditorium - leider si konzert aecht teuer doert), haight ashbury (eine vo mine lieblingsorte - nice people ;-), castro (aecht schoen, u mega gaebig als frau allei unterwaegs z si), mission (naja, soetsch am abe nid allei doert ane als frau), north beach (little italy - dr best espresso u eifach gmuetlich) u naer natuerlich union square u powell (z zentrum) u no so richi quartlier mit eindrueckliche haueser. berkeley bi i au ga aluege, die uni-stadt.

huet bi i mit aere franzoesin, wo i gester kenneglernt ha, unterwaegs gsi. mir sie aebe zaeme ga japantown aluege u no chli umeghocket. de isch de ae obdachlose ues fuer geld cho ahaue (meistens sie die aecht u naett), aber wo mir ihm nuet hei woue gae, het aer sie agspeut. da bi i aecht usgrastet. isch aecht z letschte fuer mi, oeper azspeue. o.k. haet ihm ja nid grad muesse "fuck off man" saege, denn aer isch naer voellig abdreiht u mir hei aecht muesse luege, dass mir waeg choemme. naja so viel zu mim temperament (isch nid immer ungfaehrlich mit mir;-). aber suesch isch dr nami aecht dr hammer gsi. es hei no so straessmusiker bim powell gspielt u da isch mi so ae typ zum tanze cho uffordere! isch uf jede fall ae lustigi unterhaltig fuer d touris und die andere luet gsi ;-).

i hoffe am weekend isch no chli schoens wetter, de goe mir no chli a strand u zur golden gate bridge. so mit blueme i de haar u blutfuess d ueberquerig i agriff nae... :-)

• Übersicht
• Archiv
• Alben
• Links

• aue ae chli ae sentimentale moment
• ......
• u zyt verfluegt...
• has aendlich gschafft
• die erste drue wuche...
• umzoge
• half moon bay (z surfer-paradies)
• u knallblaue himmel
• grad acho
• und mi letscht tag hie ...

• san francisco - twin peaks [6]
• san francisco - burlingame [3]
• vor dr reise [2]
• Diverses [0]

• RSS 0.90
• RSS 1.0
• RSS 2.0